Nga Anri Bala
Na e ngrin buzëqeshjen në buzë me teatrin e tyre të shëmtuar, një herë kur trokitën në shtëpinë e hajdutit dhe u larguan pasi dikush nga brenda i tha “babi thotë që nuk është këtu” dhe herën e dytë, kur hajduti u dënua me vendim të formës së prerë për mosedeklarim të plaçkës… së vjedhur. Më falni, për mosdeklarim e të ardhurave të vjedhura…
Jo prit, i’u kërkoj ndjesë! Po i kërkonin me përulje një hajduti të deklaronte se e kishte vjedhur plaçkën, që ta klasifikonin si të ardhur! Mirëpo hajduti nuk kuptoi asgjë “i varfëri” nga ky rreng i ngritur nga drejtësia, se si mund të deklaronte diçka të vjedhur si të ardhur… ndaj krisi iku, deri sa sistemi ynë të qartësohet vetë, me premtimin se do kthehet sërish, kur këta të jenë gati… praktikisht kur “të çlirohet Shqipëria”!
Ama kjo plaçkë e vjedhur, e cila vlen miliona euro, gjykata (kjo e drejtësisë së re), prokuroria e posaçme (organi i ri i akuzës i vilave të Gjirit të Lalëzit)… sapo e klasifikuan vjedhjen si një të ardhur të ligjshme, duke e kthyer në precendent të rëndë për të gjithë “hajdutët” e tjerë, që po përpiqemi të largojmë nga sistemi, të cilëve për t’ia hedhur paq drejtësisë nuk u mbetet gjë tjetër veçse të deklarojnë plaçkën e vjedhur.
Në këtë pikë, do t’i lutesha organit të akuzës t’i a kthej mbrapsht zotërisë paratë dhe pronat e sekuestruara, se ndoshta është bërë pishman, që se kuptoi që në fillim, që ju po i bënit një nder të madh duke e quajtur një “Hajdut të ndershëm, që plaçkën e ka… me djersën e ballit, si çdo hajdut që rrezikon por nuk tregon”! Iku Tiku nga përtej Adriatikut, se nuk e kuptoi bujarinë tuaj.
Ama, organizimi i “arrestimit” të kryeprokurorit në arrati ishte i paparë, me sirena, borie e fenerlina… që më shumë dukej sikur qanin e vajtonin ikjen e hajdutit të padeklaruar të tatimtaksave, se sa vdekjen e drejtësisë dhe ligjshmërisë. Në këtë logjikë, s’do jetë e largët dita ku në Qendrën Kombëtare të Biznesit do të shohim të hapur ndonjë shoqëri: Zyrë hajdutërie!
Kurse ne, që s’dimë të vjedhim, mund të degdisemi burgjeve, të akuzuar për mosdeklarim të të ardhurave të siguruara me djersën e ballit, sepse i kemi grumbulluar në rrugë “kriminale”… duke mos menduar se duhet t’i deklaronim.
Shqipëria jonë e dashur, nuk më habit për asgjë! Ti mund të shohësh e dëgjosh çdo gjë, që as e ke parë e dëgjuar ndonjëherë. Shikon derra që u duket vetja si luan, shikon xhuxha që u duket vetja si gjigandë, shikon maskarenj që u duket vetja si shëmbëlltyrë e moralit, shikon dhe drejtësi që dënon kriminelin duke i njohur si krim pandershmërinë… për të treguar të vërtetën!
Kurse unë, dje pashë një tufë të tremburish, që belbëzonin e mallkonin nën zë, se si Tiku “shpëtoi” paq nga burgu, duke na bindur se këta nuk ka zot që i bënë të paguajnë për krimet e tyre, dhe si hipokritë heshtën për ta përshëndetur, për mësimin që u dha dhe për goditjen që na dha, sepse nesër mund të jetë radha e tyre: Vidhni, vidhni mos ndaloni, vetëm aman në fund… deklaroni! /Ekskluzive.al
