Amerikanët presin që lufta e vërtetë ndaj korrupsionit të nisë vetëm pasi të jenë ngritur të gjitha organet e Strukturës së Posaçme Antikorrupsion. Deri më tani është zyrtarizuar Prokuroria e Posaçme, por që ka vetëm 9 prokurorë të emëruar, ndërkohë Gjykata Speciale është me gjyqtarë të komanduar.
Ndërkohë Byroja e Hetimit është ende në fazën e zgjedhjes së kryetarit dhe do të dojë disa muaj deri sa të jetë gati. Për ndërkombëtarët, lufta e vërtetë ndaj korrupsionit do të nisë vetëm pasi Byroja Kombëtare e Hetimit, Prokuroria dhe Gjykata e Posaçme të jenë me kapacitet të plotë. Mesazhet janë dhënë nga prokurori Federal shqiptaro-amerikan, Gjon Junçaj.
Në një intervistë për “Zërin e Amerikës”, ai deklaroi se SPAK nuk është ky që kemi tani, pasi SPAK nuk mund të cilësohet i plotësuar pa ngritjen e BKH. “E kemi gjithashtu nevojë për Byronë Kombëtare të Hetimit, krahu hetues i SPAK-ut, si dhe gjykatat e SPAK-ut. Ky është SPAK-u! Nuk është vetëm tetë apo 10 prokurorë, është më shumë se kaq. Mendoj se ky është një hap i parë i rëndësishëm, për të cilin u desh shumë kohë për të arritur deri këtu. Por po aq e rëndësishme mendoj është, nëse pyesni prokurorët në Shtetet e Bashkuara ose në Shqipëri, ata do t’ju thonë se kemi nevojë për këta hetues dhe ky është hapi tjetër që duhet të presim”, ka deklaruar Junçaj. Më tej ai ka theksuar se do të duhet kohë që SPAK të vendosë drejtësinë dhe të ndëshkojë të korruptuarit.
Junçaj u shpreh se duhet të tregohet durim në këtë aspekt. “Do të ketë raste të tjera të reja që ecin përpara. Mendoj se shqiptarët duhet të presin, pasi do të duhet kohë që këto gjëra të zbatohen e të bëhet përpara. Mendoj se do të jetë më mirë të gjykosh suksesin e Prokurorisë së Posaçme në të ardhmen. Kjo nuk do të thotë që ju nuk mund të vini në dyshim se çfarë po bëjnë ata sot, por ajo që është më e rëndësishme është që kjo gjë të bëhet hapur e me transparencë, dhe pastaj ky diskutim duhet të bëhet mes prokurorëve dhe publikut, mendimi i të cilit natyrisht është i rëndësishëm gjithashtu”, tha ai.
Yuri Kim rreshton prokurorët e SPAK
Pak ditë më parë ambasadorja e re e SHBA, Yuri Kim, zhvilloi një takim me prokurorët e SPAK, ku mësohet se ka pasur mesazhe të qarta. Sipas burimeve shumë të sigurta, Yuri Kim ka kërkuar detaje për çështje konkrete nën hetim dhe madje i ka pyetur prokurorët nëse ka zyrtarë të lartë nën hetim. Por të gjithë prokurorët kanë ulur kokat, duke treguar qartë se SPAK nuk ka ende në fokus deputetët, ministrat, e zyrtarët e lartë. Megjithatë ajo është shprehur se SHBA do jetë krah prokurorëve dhe ata nuk duhet të kenë frikë të luftojnë pushtetarët e korruptuar. Një mesazh i ngjashëm u dha edhe në mbledhjen e organizuar ditën e premte nga Ministria e Drejtësisë, ku ishte e pranishme ambasadorja Yuri Kim.
“Për të gjithë ne sonte, qofshim amerikanë, gjermanë, shqiptarë, italianë, pjesa më e madhe prej nesh, të gjithë ne në fakt, jemi qytetarë publikë, shërbyes publikë. Dhe jemi mbledhur këtu për të shënuar kauzën e nderuar “Drejtësi për të gjithë” dhe po punojmë për të siguruar begatinë ekonomike dhe demokratike të Shqipërisë. Ne mbartim një privilegj të madh dhe një detyrë edhe më të madhe për të siguruar besimin e publikut se do t’i bëjmë punët tona me integritet, me besnikëri ndaj shtetit ligjor dhe parimeve të paanësisë. Prandaj na quajnë shërbyes publikë. Në çaste kritike, Shtetet e Bashkuara kanë qenë gjithnjë pranë miqve dhe aleatëve shqiptarë. Ky çast, ndërsa ju përpiqeni të zbatoni plotësisht reformën në drejtësi, është një prej tyre. Dhe ashtu siç e kam thënë më parë, për të gjitha çastet e kaluara, ashtu dua t’ju them sërish sonte, se në reformën në drejtësi, jemi me ju krah për krah”, ka deklaruar Kim.
