Gazmend Mahmutaj, të cilit i ka shkuar sot formulari i OFL është dënuar për trafik droge dhe shfrytëzim prostitucioni në Itali.
I lidhur me emrin e tij ka qenë edhe kreu i Partisë Republikane, Fatmir Mediu, i cili është dënuar në itali me 3 vite burg dhe ndalim të ushtrimit të posteve shtetërore për akuzën e “përkrahjes së të inkriminuarve” nga Gjykata e Apelit në Milano, me një vendim të 23 prillit 2000.
Mediu ka favorizuar të kërkuarin nga drejtësia italiane, pikërisht Gazmend Mahmutajn për të kaluar drejt shtetin fqinj me emër të rremë (Raqi Gjoni).
Për këtë ngjarje Fatmir Mediu ka thënë se është shpallur i pafajshëm nga Gjykata e Lartë italiane.
Më 18 nëntor 1998, Gazmend Mahmutaj, një personazh i njohur i botës së krimit në Berat tentoi të kalonte tranzit në aeroportin ”Malpensa” në Milano bashkë me një grup parlamentarësh shqiptarë.
Ishte ironike, por deputetët shkonin në Parlamentin Evropian për një mbledhje për krimin e organizuar.
Mahmutaj, në kërkim nga autoritetet italiane, kishte siguruar dokumente të falsifikuara me emrin Raqi Gjoni dhe udhëtonte me Mediun si zyrtar i PR.
Trupi gjykues në Itali, në shkallën e Parë dhe atë të Apelit e dënoi Fatmir Mediun me 4 vite e 6 muaj burg dhe pas procedurës me gjykim të shkurtuar, ai u dënua me 3 vite burg.
Gazmend Mahmutaj është vëllai i Kasem Mahmutaj i kandiduar nga Partia Republikane në zgjedhjet lokale te vitit 2007 dhe në vitin 2015 u kandidua nga PD e drejtuar nga Lulzim Basha, po për kryetar Bashkie Berat.
Kasem Mahmutaj ka qenë drejtor i objektit më të madh të industrisë ushtarake, në Poliçan, duke qenë njëkohësisht dhe kreu i Partisë Republike në Berat që në mars të 2008./dita
