Ditë e vështirë për një nga “mitet” e kombëtares holandeze, dhe sot trajner i saj. Ronald Koeman u shtrua sot me urgjencë në një nga spitalet e Amsterdamit, si pasojë e problemeve kardiake.
Ndërhyrja e shpejtë e mjekëve të cilët i kanë vënë një “unazë” kardiake, një tub i vogël që futet në arteriet koronare të ngushtuara apo të bllokuara, ka stabilizuar trajnerin holandez, i cili do të kalojë natën në spital, dhe nesër në qoftë se gjithçka shkon mirë mund të rikthehet në shtëpi.
Një nga mbrojtësit më të fortë të viteve ’80-’90, Koeman njihej edhe për gjuajtjet e tij tejet të forta dhe të sakta, me të cilat ka shënuar 239 gola me klube si Ajaks, PSV dhe Barcelona, si dhe 14 me fanellën e Kombëtares.
