Pastrimi i parave të korrupsionit, aq më tepër kur je subjek i deklarimit të pasurisë, është një hall më vete.
Për shembull, Ilir Beqja, protagonist i 350 milionë euro koncensione korruptive në shëndetësi dhe të mbi 300 milionë euro tendera, po i pastron paratë përmes rrjetit të farmacive Ditë e Natë, një restoranti në Tiranë dhe disa bizneseve në emër të gruas, ku përfshihet një fabrikë vaji, një fermë etj.
Drejtori i Drejtorisë së Përgjithshme të Shërbimeve të Transportit Rrugor, Blendi Gonxhja, po përdor një kompani të të birit, Dante, duke qarkulluar paratë të dyshimta dhe futur në llogari bankare si të ligjshme.
Arben Ahmetaj i ka kamufluar vilat dhe apartamentet në emër të gruas me letra Albina Mança, të nuses së re Erjola Hoxha si dhe në emrin e një anëtari të bandës së Aldo Bares.
Blendi Klosi ka fshehur një vilë në Palasë me vlerë rreth 1 milionë euro, si dhe një apartament luksoz tek kulla para “Ekonomikut” në Tiranë, në emrin e Sandrit, mikut të tij të besuar.
Flamur Noka posedon një vilë në Gjirin e Lalzit me vlerë 750 mijë euro, të cilën e ka kaluar në emrin e Petrit Mahos, oktapodit të tenderave në shëndetësi.
Damian Gjiknuri nuk është menduar gjatë, duke deklaruar pasuri në vlerë 400 mijë USD pa burime të ligjshme, ndërsa më pas një vilë 280 mijë USD, ku në lojë ka futur edhe bashkëshorten me gjoja disa projekte. Gjiknuri dyshohet se ka një pasuri me vlerë rreth 50 milionë euro, në emër të disa biznesmenëve si dhe aksione të fshehura në disa kompani që u ka dhënë tendera dhe leje për HEC-e kur ishte ministër.
Një formë jo aq të zakonshme ka ndjekur drejtori i KESH, Ergys Verdho, i konsideruar si ‘margaritari i korrupsionit’ gjatë dekadës së fundit. Verdho ka ‘shkëlqyer’ si drejtor i ARRSH-së, ashtu edhe si drejtor i KESH.
Verdho ka futur në lojë kunatin, i cili i kalon në llogari bankare shuma parash motrës së tij Dorinës, që është bashkëshortja e Verdhos. Prapaskena ka parë disa transaksione të kësaj natyre, të cilat prokuroria mund t’i administrojë lehtësisht.
Ka dyshime se Verdho i kalon cash kunatit paratë e korrupsionit me tendera dhe sidomos me dallaveret e shit-blerjes së energjisë, ndërsa kunati ia kalon më pas një pjesë të parave në llogari si dhuratë motrës së tij, bashkëshortes së Verdhos.
Dorina Selimi Verdho punon në KESH, institucion që drejtohet nga burri i saj, në konflikt flagrant interesi. Pra, burri është shef i gruas së tij në një institucion publik.
Jo vetëm kaq. Ergys Verdho ka bërë pjesë të kësaj skeme pastrimi parash edhe vëllain e tij. Kreu i KESH dyshohet se i kalon para cash vëllait për të blerë pasuri të palujtshme, i cili më pas ia dhuron Ergysit.
Kreu i KESH Ergys Verdho ka deklaruar disa pasuri të palujtshme, me burim të dyshimtë, ndërsa ka dyshime të forta se ka kaluar në emër të njerëzve të afërt disa vila, dyqane dhe apartamente.
Prapaskena do të publikojë në vijim një skemë vjedhje flagrante të orkestruar nga Ergys Verdho, me shit-blerjen e energjisë, ku dëmi në buxhetin e shtetit shqiptar shkon miliona euro. Vjedhja është sa banale aq edhe e frikshme.
