SHKRUAR NGA RIGELS SELIMAN
Zvarritja e shkarkimit të Ilir Metës nga posti i Presidentit të Republikës ka irrituar një pjesë të deputetëve të Partisë Socialiste. Edhe pse procedurat për shkarkimin e Metës nga detyra nisën që në muajin korrik të vitit që lamë pas, sot ai vijon të jetë në krye të shtetit, për shkak se mazhoranca ka shtyrë disa herë afatet e komisionit hetimor. Por kjo gjë ka shkaktuar debate në mbledhjen e grupit të PS që u mbajt ditën e enjte para seancës plenare.
Gazeta ka mësuar se disa deputetë socialistë kanë kërkuar sqarime nga kreu i grupit, Taulant Balla se përse po ndiqet kjo strategji. Burime shumë të sigurta nga kjo mbledhje, theksuan se ligjvënësit socialistë kanë ngelur tejet të zhgënjyer nga mënyra se si shumica qeverisëse po vepron me dy standarde për këtë çështje. Në këtë kontekst, mësohet se ata janë shprehur para deputetit Balla se për ta ka ardhur koha që mazhoranca ta ndajë nëse do ta shkarkojë apo jo Metën nga detyra dhe se për ta zvarritja e kësaj çështje nuk është lojë. Madje, për t’i treguar Ballës se ata janë tejet të zëmëruar me mënyrën se si mazhoranca po vepron në lidhje me presidentin Meta, mësohet se këta deputetë i kanë kujtuar shefit të tyre edhe akuzat dhe sulmet e kreut të shtetit të artikuluara në adresë të socialistëve. Sipas tyre, të gjitha këto janë arsye që mazhoranca të mos zvarrisë procesin, por ta çojë deri në fund nismën e saj për ta shkarkuar Metën nga detyra dhe më pas të jetë Gjykata Kushtetuese që të japë vendimin final.
Amnistimi i Berishës
Por zvarritja e shkarkimit të presidentit Ilir Meta nga detyra, nuk është e vetmja çështje që ka shqetësuar disa nga deputetët e Partisë Socialiste me kupolën drejtuese të kësaj partie. Gazeta ka mësuar se në mbledhjen që grupi socialist zhvilloi ditën e enjte, të njëjtët deputetë që i kërkuan llogari shefit të tyre, zotit Taulant Balla, kanë shprehur rezerva edhe mbi mënyrën se si po pushohen shumë dosje të bujshme, për të cilat socialistët kur ishin në opozitë, kishin premtuar që do t’i zbardhnin sapo të vinin në pushtet. Sipas informacioneve, mësohet se shqetësimi i parë që ata kanë vënë në dukje dhe që nuk duhet që të përfundonte në mënyrën më të turpshme është pushimi i hetimeve nga ana e Gjykatës së Tiranës sa i takon dosjes “CEZ”, në të cilën janë të akuzuar ish-kryeministri Sali Berisha dhe shumë ish-ministra të tij, pasi kanë abuzuar me fondet e shtetit.
Në këtë kontekst, mësohet se deputetët janë shprehur para Ballës se për ta është e papranueshme që ish-kryeministri amnistohet nga drejtësia. Po ashtu, të njëjtët burime nga mbledhja i pohuan gazetës se Berisha nuk duhet të amnistohet edhe në lidhje me masakrën e “21 Janarit” ku gjatë protestës së opozitës në vitin 2011 mbetën të vrarë katër qytetarë të pafajshëm. Sipas tyre, zbardhja e kësaj tragjedie ishte një nga shumë premtimet e dhëna nga socialistët para se të vinin në pushtet.
Socialistët kërkojnë hetim të krimeve të PD
Një tjetër çështje, e cila ka shkaktuar debate në mbledhjen e grupit të Partisë Socialiste paraditen e së enjtes që lamë pas, ishte edhe mbyllja e disa dosjeve të tjera, për të cilat akuzohen shumë zyrtarë të Partisë Demokratike. Gazeta ka mundur të sigurojë një nga këto dosje, për të cilat socialistët i kanë kërkuar llogari kreut të grupit, Taulant Balla, sikundër është ajo për lobimin rus të PD në Shtetet e Bashkuara të Amerikës. Në këtë kontekst, mësohet se deputetët janë shprehur se për ta është e papranueshme që socialistët po miratojnë amnistinë, duke nxjerrë nga burgu qytetarët dhe në një kohë kjo mazhorancë nuk bën asnjë veprim për të çuar para drejtësisë zyrtarët e PD që vërtet e meritojnë burgun. Pra, mësohet se socialistët kanë shfrytëzuar çështjen e amnistisë për t’i kujtuar Ballës se ajo duhet të jetë më e madhe dhe se PS duhet që ta pastrojë figurën e saj, në mënyrë që të insistojë që në burg të futen të korruptuarit dhe jo qytetarët e thjeshtë, sikundër ka ndodhur gjatë këtyre 6 viteve.
