Mbrëmë rreth orës 20:00, agjentët e krimit ekonomik kanë trokitur ne banesën e Arben Meskutit. Ai u arrestua ne banesën e tij në zonën e pazarit te ri
Dyshohet se Meskuti po largohej nga Shqipëria me pasaportë false amerikane pas zbulimit të një aktiviteti kriminal në fushën e mikrokredive.
Arben Meskuti është pronar i disa kompanive si FINAL, ZIG dhe ADCA që bashkë me Micro Credit Albania janë satelitë të IuteCredit Albania.
I akuzuar disa herë për mashtrim vitet e fundit, Meskuti ka arritur të shpëtojë.
Ceo i IuteCredit Akan Ajdini dhe pronari i FINAL Arben Meskuti kanë krijuar një skemë mashtrimi ku njëri jep kredi dhe tjetri blen dhe mbledh me një kompani fiktive përmbarimi ADCA.
Minikreditë jepen nëpër dyqane elektroshtëpiakesh dhe telefonash nga IuteCredit dhe pasi “blihen” nga Arben Meskuti kërkohen disafish me përmbarimin ADCA.
Në lidhje me abuzimet e Arben Meskutit reagoi edhe Presidenti i Republikës Ilir Meta, i cili përmes një letër publike, iu bëri thirrje institucioneve të reagojnë dhe të ndalen abuzimet që iu bëheshin qytetarëve. / Priza
Historia e mafies së kredive
Në Tiranë ushtron prej 7 vitesh aktivitetin me natyrë mafioze, grabiqare, zhvatëse dhe okulte një klan famëkeq familjar, nën drejtimin Olsi Ibro dhe Arben Meskuti, të cilët njihen ndryshe si ‘dy Sudet’ apo edhe si “Ujku i Wall Street-it” simbolin e mashtrimit në SHBA, i kthyer në film.
Dy ‘Sudet’ në fakt kanë ardhur nga SHBA, duke ngritur në mes të Tiranës, sipas Ministrisë së Drejtësisë, një qendër të madhe dhe të sofistikuar mashtrimi dhe grabitjeje në fushën e mbledhjes së kredive të këqija. Ata veprojnë nën hundën e policisë, prokurorisë, shërbimeve informative, pastrimit të parave dhe SPAK.
Qendra e Biznesit e dyshes quhet STAR, simbol i yjeve të abuzimit dhe zhvatjes së të pafuqishmëve që nuk paguajnë dot këstet e kredive në bankat e nivelit të dytë.
Qendra ushtron aktivitetin disa metra larg Ministrisë së Drejtësisë, në ish-godinën e gazetës “Zëri i Popullit”.
Olsi Ibro dhe Arben Meskuti kanë krijuar një rrjet kompanish si Consulting Company, Final, Micro Credit Albania (MCA), ADCA, ZIG, FLASH, FS, Re/Plus, Re/Max. Grupi i kompanive kontrollohen nga klani familjar Olsi Ibro, Elda Ibro, Arben Meskuti, Yllka Meskuti, Ernela Cuberi dhe Indrit Cuberi.
Aktiviteti mafioz i klanit familjar në mbledhjen e kredive të këqija është i njohur nga Shërbimi Informativ Shtetëror, strukturat e policisë, shërbime të tjera dhe nga Ministria e Drejtësisë.
Skandali konsiston në mosveprimin e prokurorisë dhe policisë, organe të cilat në një farë mënyre po mbështesin dy ‘Sudet’.
Në shkurt të vitit 2020, Ministria e Drejtësisë ka dorëzuar në Prokurorinë e Tiranës një nga dosjet penale më voluminoze në historinë e pluralizmit në Shqipëri, ku vetëm lista e të mashtruarve nga mafia ‘STAR’ është me rreth 5 mijë qytetarë.
Ministria e Drejtësisë i kërkoi me urgjencë prokurorisë të nisë hetimet dhe të marrë të pandehur të gjithë anëtarët e klanit STAR për veprat penale të “Mashtrimit të shumëfishtë”, “Shpërdorimit të detyrës” dhe “Përvetësimit të titullit apo detyrës shtetërore” për gjithë zinxhirin e krijuar brenda “Qendrës së Biznesit STAR”. Në dosjen e Ministrisë së Drejtësisë faktohet aktiviteti kriminal i dy ‘Sudeve’.
Qindra denoncime dhe kallëzime të tjera janë bërë për klanin STAR. Edhe pse po kalojnë gati dy vite, nuk është marrë asnjë masë.
Dy ‘Sudet’ Olsi Ibro dhe Arben Meskuti vijojnë aktivitetin kriminal tashmë në përmasa të frikshme, duke shtërnguar qytetarët, me veprime, sekustrime dhe bllokim arbitrar të llogarive bankare, duke marrë atribute të gjykatës.
Do të duhet që SPAK të nisë një hetim historik për mafien STAR dhe për prokurorët që flenë prej dy vitesh mbi kallëzimin e Ministrinë e Drejtësisë.
