Sali Berisha rrezikon të përballet me veprime të tjera nga amerikanët. Shpallja “non grata” mund të jetë lëvizja e parë, pasi në lojë përveç drejtësisë shqiptare ka hyrë edhe Departamenti i Thesarit.
Vetë Berisha e ka deklaruar se amerikanët i kishin dërguar mesazhe përmes Bashës se do ketë sanksione ekonomike ndaj tij dhe familjes së tij nëse nuk tërhiqet. Nga ana tjetër ambasadorja amerikane pak ditë më parë tha se për dosjen e tij janë angazhuar, CIA, FBI dhe një numë ri madh ekspertësh.
Por këto fakte dhe prova që janë mbledhur, nuk do shkojnë në Francë siç pret Berisha, por te Departamenti i Thesarit. Gazeta ka siguruar strategjinë antikorrupsion të miratuar nga presidenti Biden. Aty bëhet e qartë se do të ketë sanksione ekonomike ndaj politikanëve të huaj të përfshirë në korrupsion, sidomos për ata që janë shpallur “non grata” sipas përcaktimeve të nenin 7031 (c).
Por interesant është fakti se aty përcaktohet qartë se për të arritur në sanksione të drejta do të angazhohet FBI, shërbimet inteligjente dhe të gjitha institucionet e tjera ligjzbatuese dhe ato të së drejtës, si Departamenti i Drejtësisë dhe Departamenti i Shtetit. “Njësia Ndërkombëtare e Korrupsionit e FBI-së, në bashkëpunim me Departamentin e Drejtësisë, kanë krijuar skuadra në zyrat ekstraterritoriale për të hetuar rastet e partive të huaja korruptive.
Që nga viti 2016, këto skuadra kanë kontribuar në sigurimin e 172 ndëshkimeve, 20 marrëveshje për ndjekjeje penale dhe 13 marrëveshje jo-ndjekjeje penale, dhe kanë mbledhur mbi 18 miliardë dollarë nga dënimet monetare penale dhe civile”, thuhet aty.
Por nëse kthehemi pak ditë më pas, ambasadorja amerikane tha në një intervistë se për Berishën janë angazhuar CIA, FBI, DASH dhe shumë institucione të tjera. Kjo do të thotë se tashmë të dhënat që i shkuan DASH do i shkojnë Departamentit të Thesarit, për të ndjekur hapat mbi sanksionet ekonomike.
Personat e padëshiruar
Më tej në raport tregohen hapat që do merren ndaj personave “non grata”. Përveç sanksioneve, do bashkëpunohet dhe me shtetet përkatëse që të shkohet te ndëshkimi. “Kufizimet e vizave kundër korrupsionit dhe sanksionet funksionojnë duke rritur presionin mbi aktorët e korruptuar përmes veprimeve të koordinuara me shumë vende.
Në partneritet me Departamentin e Thesarit, do të koordinohen veprimet për të përforcuar ndikimin e sanksioneve dhe bllokimin e vizave të SHBA. Shteti amerikan do të angazhohet gjithashtu në shenjëstrimin e kontakteve me vende specifike me sisteme financiare të lidhura globalisht, ku aktualisht mungojnë masat e llogaridhënies kundër korrupsionit, të tilla si sanksione dhe kufizime vizash, me qëllim që të inkurajohen ata që të miratojnë autoritete të ngjashme me Global Magnitsky dhe Seksionin 7031(c)”, thuhet në raport.
Siç bëhet me dije, amerikanët do të krijojnë një aleancë me të gjitha agjencitë e tyre ligjzbatuese për të goditur të korruptuarit. Më tej thuhet se Departamenti i Shtetit Thesari, FBI dhe institucionet e tjera do të angazhohen për të zbuluar dhe ndërprerë rastet e korrupsionit nga përfaqësues të huaj, ndërkohë që do merren masa që ata të mos fshehin dot pasuritë e tyre korruptive.
