Byroja Kombëtare e Hetimit pritet të jetë gati para vendimit për negociatat. Në maj Brukseli do të vendosë për fatin e Shqipërisë, ndërsa në të njëjtin muaj pritet që BKH të jetë e kompletuar. Sipas burimeve të gazetës, brenda marsit do të zgjidhet kreu i Byrosë Kombëtare të Hetimit dhe ai do të merret më pas me rekrutimin e stafit.
Personi i parë që do të zgjidhet pas kreut të Byrosë Kombëtare të Hetimit, do të jetë zëvendësdrejtori, i cili do të ketë rol të rëndësishëm në luftën ndaj krimit dhe korrupsionit. Paralelisht në zgjedhjen e tij do të nisë procesi i përzgjedhjes së hetuesve të Byrosë Kombëtare të Hetimit. Nga ana tjetër, ndryshe nga përzgjedhja e drejtuesit që mori plot 1 muaj kohë, për hetuesit procesi pritet të jetë i shkurtër, ndërsa prej javësh është thënë që ky proces ka vijuar. Ndërkohë kujtojmë se ka qenë Këshilli i Lartë i Prokurorisë që prej muajsh ka hapur garën për hetuesit e Byrosë së Hetimit, konkretisht në shtator të 2019, në kohën kur u hap edhe gara për kreun e BKH. Ndërsa vetë SPAK dhe Byroja Kombëtare e Hetimit, pritet ta ndërmarrë këtë veprim pas disa ditësh, pasi për tani primare është zgjedhja e kreut të BKH-së. Kujtojmë se u kualifikuan në fazën e fundit Aida Veizaj, Artur Beu, Ervin Hodaj, Idajet Faskaj.
Kriteret dhe trajnimet për hetuesit e BKH
Por cilat janë kriteret që kandidatët për hetues në Byronë e Hetimit duhet të plotësojnë? Në ligjin “Për organizimin dhe funksionimin e institucioneve për të luftuar korrupsionin dhe krimin e organizuar”, neni 38 sqaron më tej për këtë pyetje. Në thelbin e kritereve që hetuesit duhet të plotësojnë, është lidhja e tyre me qëllim kryesor të Byrosë së Hetimit. “Është shtetas shqiptar; ka arsim të lartë policor, në drejtësi apo kontabilitet, ose arsim të lartë në degë të tjera që kanë lidhje me misionin e BKH, nga një universitet vendas apo i huaj; ka një përvojë më shumë se 1-vjeçare pune në institucionet e zbatimit të ligjit ose në një fushë tjetër që lidhet me qëllimin e Byrosë Kombëtare të Hetimit; të ketë plotësuar me sukses kriteret e përzgjedhjes dhe trajnimit për Byronë Kombëtare të Hetimit”, thuhet në ligj.
Çdo person që ka kaluar testet dhe kushtet për të qenë anëtar i Byrosë, i nënshtrohet një regjimi rigoroz trajnimi dhe arsimimi, me një sërë modulesh vlerësimi që duhen kaluar përpara se të certifikohet. Pasi është certifikuar si i trajnuar dhe i aftë, kandidati konsiderohet hetues. Po ashtu çdo dy vjet hetuesit do kalojnë në testim dhe kush ngel, largohet nga detyra. Pra, kjo do të thotë se Byroja e Hetimit do jetë mjaft e përgatitur dhe rol shumë të madh do kenë të huajt. Një agjent i FBI do qëndrojë aty për më shumë se dy vite dhe do japë udhëzime për luftën ndaj korrupsionit. FBI do këtë një zyrë të vetën që do bëjë trajnime. Nga ana tjetër edhe në SPAK SHBA-BE do kenë zyrat e tyre.
Roli hetuesve
Një rol të rëndësishëm në Byronë e Hetimit do të kenë hetuesit. Sipas ligjit, hetuesi është punonjës i Byrosë Kombëtare të Hetimit, i cili është përgjegjës për hetimin. Ai gëzon statusin e oficerit të policisë gjyqësore dhe kryen hetime vetëm nën drejtimin e prokurorëve të Prokurorisë së Posaçme. Kandidati për hetues i Byrosë Kombëtare të Hetimit përzgjidhet pas një procesi rekrutimi, që mbështetet në praktikat më të mira të rekrutimeve konkurruese, të cilat parashikohen në një rregullore të hartuar dhe miratuar nga Drejtori i Byrosë Kombëtare të Hetimit. Një kandidat mund të emërohet si hetues vetëm pasi të ketë përfunduar trajnimin përkatës dhe të ketë shfaqur aftësitë, që garantojnë kryerjen e detyrave sipas standardeve të kërkuara profesionale në përputhje me nenin 38 të këtij ligji. Emërimi i hetuesit në Byronë Kombëtare të Hetimit bëhet nga Drejtori, me pëlqimin e Drejtuesit të Prokurorisë së Posaçme. Hetuesi caktohet nga Drejtori i Byrosë Kombëtare të Hetimit ose Drejtuesi i Prokurorisë së Posaçme që të punojë me një prokuror të Prokurorisë së Posaçme.
