Kjo puna e këshilltarëve gjermanë ka dalë në modë në Shqipëri. Pas Lulzim Bashës, që paguan një person me mbiemrin Henze, i cili pretendon se është këshilltar i Merkel dhe CDU-së gjermane, gjë që normalisht nuk është e vërtetë, këtë radhë është Ilir Meta ai që ka gjetur një tjetër këshilltar gjerman.
Madje, Meta e ka dekoruar atë edhe me urdhërin “Kalorës i Urdhrit të Skënderbeut”.
Arsyen e nderimit të tij, vetëm Ilir Meta e di.
Por, nuk duhet shumë mend për ta kuptuar, kur lexon deklaratën që ka lëshuar Hans-Joachim Falenski, i cili është prezantuar nga ana e Presidencës, si kryekëshilltar për Politikën e Jashtme në CDU-CSU.
Ai ka qenë disa herë në takimet e Lulzim Bashës, që, ndryshe nga Meta, e ka prezantuar thjesht si “këshilltari i grupit parlamentar të CDU-së së Anxhela Merkelit”.
Pasi ka marrë medaljen, ai ka dhënë një deklaratë të gjatë, në të cilën shprehet se Gjermania ka vendosur dy parakushte që duhet të përmbushen nga Shqipëria përpara zhvillimit të Konferencës së parë Ndërqeveritare për hapjen e negociatave (nuk dihet se në emër të kujt flet ai për kushtet e reja gjermane, kur nuk përfaqëson as Qeverinë dhe as Bundestagun).
Ai veçon funksionimin e Gjykatës Kushtetuese dhe Gjykatës së Lartë me gjyqtarë që kanë kaluar vettingun, duke nënvizuar se kjo duhet bërë në përputhje të plotë me Kushtetutën.
“Dhe kjo përfshin jo vetëm procesin e zgjedhjes së gjyqtarëve që kanë kaluar vetingun, por edhe procesin e marrjes së vendimeve ose – për shembull – ceremoninë për t’i bërë gjyqtarët të betohen mbi Kushtetutën”, tha ai.
Më tej, Falenski shtroi pyetjen:“Nëse nenet përkatëse të Kushtetutës nuk respektohen plotësisht në këtë moment të rëndësishëm të një fillimi të ri, si mund të besojmë se puna e ardhshme e Gjykatës Kushtetuese do të kryhet në përputhje të plotë me Kushtetutën?”
Ai shtoi se përqendrimi i të gjitha pushteteve në një dorë është i rrezikshëm për Gjermaninë.
“Një vend kandidat ka nevojë për një sistem demokratik me kontrolle dhe ekuilibra funksionues. Të gjitha pushtetet në një dorë të vetme, në shumicën e rasteve, janë të rrezikshme për demokracinë dhe nuk ju afrojnë aspak më pranë Evropës. Për këtë arsye është urgjentisht e nevojshme të krijoni një sistem funksionues të kontrolleve dhe ekuilibrave këtu në vendin tuaj”, thotë ai.
Ai veçoi edhe lirinë e medias si shqetësim për Gjermaninë, duke përmendur paketën antishpifje, e cila aktualisht ndodhet për shqyrtim në Komisionin e Venecias.
Ai përmend edhe një nga kushtet prej 9 pikash të Bundestagut gjerman për hapjen e negociatave, siç është kushti lidhur me blerjen e votave
“Për Bundestag-un blerja e votave është rasti më i keq në një demokraci. Për këtë arsye Bundestag-u ka ndjekur me përparësi ecurinë e dosjeve 184 dhe 339, por gjithashtu edhe me shqetësim deri këto ditët e fundit”, thotë ai.(TemA)
