Pas njoftimit zyrtar se Salianji, Tritani dhe disa të tjerë janë eleminuar nga lista e kandidatëve për deputetë nga Komisioni “Nishani”, Bilushi i Metës u ka bërë atyre një letër mbështetëse në emër të presidentit:
“I dashur Salianj!
I nderuar Tritan!
Mësuam se Komisioni ‘Nishani’ nën drejtimin e Rulit, ju ka përjashtuar ju pa të drejtë nga lista e kandidatëve për deputetë.
Arsyet për këtë përjashtim nuk janë bindëse dhe reflektojnë interesa të ngushta meskine të Komisionit ‘Nishani’ që drejtohet nga Ruli, dhe keqdashje ndaj LSI-së.
Së pari, eleminimi i Salianjit, me argumentin se ai dhe bashkëjetuesja e tij nuk mund të jenë të dy kandidatë për deputetë në PD, është një goditje ndaj LSI-së, pasi kërkon të vrasë modelin e LSI në PD.
Me këtë akt, Komisioni ‘Nishani’ kërkon të thotë se LSI është parti jo demokratike, meqë janë burrë e grua në krye të saj.
Kjo jo vetëm që nuk e dëmton partinë, por e forcon atë më shumë.
Pse u lejoka të jetë dhe Luli dhe Kunati, dhe nuk u lejoka burrë e grua!
Kjo është e gjitha spekulim, që tenton të denigrojë LSI-në brenda PD-së.
Ndaj ne e dënojmë atë dhe si provokim ndaj LSI-së.
Në rastin e Tritan Shehut është përdorur si kriter mosha.
Me këtë duan të godasin Doktorin, që është edhe më i madh se Tritani, por meqë ai nuk është në listë, bëjnë sikur ndëshkojnë Tritanin.
Ndaj ne jemi të fyer, pasi dhe duke goditur Doktorin, godasin LSI-në.
E vërteta është se Tritanin e ka goditur Ruli, pasi ai i ka zënë vendin më 2017 në Gjirokastër.
Ndaj u bëj thirrje të dyve të paraqiteni në listën e LSI-së, bashkë me Klevis Balliun.
Vetëm atëhere PD do të kuptojë vlerat tuaja reale.
Komisioni ‘Ruli- Luli’ donte të përjashtonte dhe Aldon me Mul Nokën nga lista, por u ngeci sharra në gozhdë, ngaqë në formularë nuk ka kriter që budallenjtë duhet të hiqen nga lista.
Kurse me ju gjetën shkaqe të tjera banale.
Ju presim. Mbani kokën lart. Ne do fitojmë!”
